స్విస్ బ్యాంకుల్లో తగ్గిన భారతీయుల నిధులు

స్విస్ బ్యాంకుల్లోని భారతీయ ఖాతాదారులు, సంస్థలకు సంబంధించిన నిధులు 2025లో 8 శాతానికి పైగా తగ్గుముఖం పట్టాయి. స్విస్ నేషనల్ బ్యాంక్ విడుదల చేసిన వార్షిక గణాంకాల ప్రకారం, భారతీయుల మొత్తం నిధులు 3.25 బిలియన్ స్విస్ ఫ్రాంక్స్‌‌కు (సుమారు రూ. 36,793 కోట్లు) చేరాయి. 2024లో ఈ నిధులు మూడు రెట్లు పెరిగి 3.55 బిలియన్ ఫ్రాంకులకు చేరిన నేపథ్యంలో, తాజా తగ్గుదల ప్రాధాన్యత సంతరించుకుంది.

ఈ నివేదిక ప్రకారం, 2025లో మొత్తం నిధులు తగ్గినప్పటికీ, భారతీయ వ్యక్తులు, సంస్థలు నేరుగా జమ చేసిన కస్టమర్ డిపాజిట్లు మాత్రం 50 శాతానికి పైగా వృద్ధి చెంది 524 మిలియన్ ఫ్రాంకులకు (సుమారు రూ. 6,000 కోట్లు) చేరడం గమనార్హం. అయితే, మొత్తం నిధుల్లో వీటి వాటా కేవలం 16 శాతం మాత్రమే. స్థానిక శాఖలు, ఇతర ఆర్థిక సంస్థల ద్వారా ఉన్న నిధులు తగ్గడమే మొత్తం తగ్గుదలకు ప్రధాన కారణంగా తెలుస్తోంది.

దేశంలో నల్లధనంపై చర్చ జరిగిన ప్రతిసారీ స్విస్ బ్యాంక్ గణాంకాలపై ప్రత్యేక ఆసక్తి నెలకొంటుంది. అయితే, ఈ డేటాలో అక్రమ నిధుల వివరాలు ఉండవని, ఇది కేవలం స్విస్ బ్యాంకుల మొత్తం బాధ్యతలను మాత్రమే సూచిస్తుందని ఆ బ్యాంకు స్పష్టం చేసింది. 'ఆటోమేటిక్ ఎక్స్‌ఛేంజ్ ఆఫ్ ఇన్ఫర్మేషన్' ఒప్పందం కారణంగా భారత్, స్విట్జర్లాండ్ మధ్య ఆర్థిక సమాచార మార్పిడిలో పారదర్శకత గణనీయంగా పెరిగింది.

స్విస్ బ్యాంకుల్లో అత్యధిక నిధులు కలిగి ఉన్న దేశాల జాబితాలో భారత్ 46వ స్థానంలో నిలవగా.. యూకే, అమెరికా, ఫ్రాన్స్ దేశాలు అగ్రస్థానాల్లో ఉన్నాయి. ఇదే క్రమంలో, స్విస్ బ్యాంకుల్లోని మొత్తం విదేశీ నిధులు కూడా 8 శాతం మేర తగ్గి 1.05 ట్రిలియన్ ఫ్రాంకులకు చేరుకున్నాయి.